Urwibutso rwa Yvan Buravan utakibarizwa mu isi y’abazima

Dushime Burabyo Yvan cyangwa Buravan, Ni mwene Burabyo Michael na Uwikunda Elizabeth. Ni bucura mu bana batandatu, yabonye izuba kuwa 27 Gicurasi 1995.

Amashuri abanza yayigiye I Gikondo ahitwa ‘Le Petit Prince’, ayisumbuye ayigira muri ‘Amis des Enfants’ na ‘La Colombiere’. Yize kaminuza muri Kaminuza y’u Rwanda CBE, mu bijyanye n’ubucuruzi, itumanaho n’ikoranabuhanga (Business Information and Technology.

Yatangiye kuririmba muri 2009, aho yitabiriye amarushanwa ya RwandaTel, aba uwa kabiri ahabwa amafaranga miliyoni n’igice ndetse no muri 2012, yitabira amarushanwa ya Talentum, aza mu ba mbere bahembwe ko ari abahanga.

Indirimbo ye ya mbere yayisohoye muri 2015, Gusa yamenyekanye cyane muri 2016 ubwo yashyiraga hanze indirimbo ye ya kabiri “Malaika”, Kuva ubwo yatangiye kuzamuka cyane haba mu gukurikiranwa ku mbuga nkoranyambaga ndetse no ku mbuga zitandukanye zicururizwaho umuziki kubw’indirimbo ze zumviswe na benshi zo mu njyana nka R&B na Pop.

Buravan ubwo yari amaze gukora zimwe mu ndirimbo zakiriwe neza n’abakunzi ba muzika Nyarwanda nka “Bindimo”, “Urwo Ngukunda” yakoranye na Uncle Austin byatumye abengukwa n’inzu itunganya muzika ya “Infinity”. Kuva ubwo ntiyasubiye inyuma kugeza ubu ubwo yari afite indirimbo zakunzwe na Benshi nka “Tiku Tiku” , “Twaje” , “Toté” n’izindi nyinshi.

Muri 2018 yitabiriye ndetse anatsindira igihembo nyamukuru mu marushanwa ya Prix Decouvertes RFI musical ibintu byazamuye urwego rwe rw’umuziki ndetse bimwongerera abakunzi mu bihugu bitandukanye bya Afurika ndetse no hanze yayo, Ibyo byabaye nyuma y’uko asohoye umuzingo we wa mbere “The love lab” mubyo yahembwe harimo no gufashwa gukorera ibitaramo mu bihugu 12 bitandukanye ku mugabane wa Afurika ari nabyo bitaramo yari akoze bwa mbere bizenguruka ibihugu birenze kimwe.

Kuwa mbere Taliki 18 Nyakanga 2022 Buravan yagiye kwivuriza muri Kenya, uburwayi yari amaze igihe yivuriza muri CHUK ariko ntibigire icyo bitanga.

Amakuru twamenye n’uko Buravan nyuma y’uko asohoye indirimbo Big Time yahise afatwa n’uburwayi bw’amayobera bwamuzahaje ndetse bugatuma ajya no mu bitaro ariko nyuma akaza kuvamo avuga ko bishoboka ko cyari igifu ariko akaba yarorohewe. Nyuma y’icyumweru kimwe uyu muhanzi avuze ko ari koroherwa haje kumenyekana amakuru ko yagiye kwivuriza muri Kenya.

Umwe mu nshuti ze za hafi waganiriye na Igihe yagize ati: “Yafashwe n’uburwayi ako ariye kose kakagaruka, yagiye kwa muganga bamuvura igifu aroroherwa ariko byanze gukira.”

“Nyuma y’uko Yvan abonye ko nta mpinduka na nyuma yo kwivuza nibwo yafashe umwanzuro wo kujya kwivuriza muri Kenya.”

Inshuti z’uyu muhanzi barimo abahanzi bagenzi be ndetse n’abanyamakuru bose bagaragaje ko bahangayikishijwe n’uburwayi bwa Buravan ndetse bamusabira n’amasengesho kugirango Imana imworohereze.

Nyamara no muri Kenya ntabwo yahakiriye nubwo byavugwaga ko bagerageje kumufasha akoroherwa ariko nabo byarangiye basanze ntacyo bakora ku burwayi bwe na cyane ko bwari bukiri amayobera.

Mu ijoro ryo kuwa mbere rishyira kuwa kabiri saa saba ubwo twari tumaze isaha imwe twinjiye ku italiki ya 17 Kanama, nibwo inkuru mbi yasesekaye ko uyu muhanzi w’umuhanga atabashije gukomeza guhangana n’ubuzima aho yavurirwaga mu buhinde, gusa kuri iyi nshuro, byatangajwe ko azize Kanseri y’urwagashya, Abari inshuti ze ndetse n’abandi bafite aho bahuriye nawe haba abakunzi be, abanyamakuru ndetse n’ibigo bitandukanye yagiye akorana nabyo bahise bagaragaza akababaro ndetse n’icyuho gitewe no kuba tumubuze mu ruhando rwa muzika nyarwanda, gusa bahuriza ko ibihangano bye bizahoraho ndetse bizahora bigezweho uko ibiragano by’umuziki bizahinduka kose.

Ntitwasoza tutamwifurije kwakirwa aheza mu ijuru, agahemberwa ibyiza yakoze ariko akanababarirwa aho yaba ataratunganiye Imana, Inna lillahi wa ina illaihi wa rajiun.

Mugihe yamaze mu ruganda rwa Showbiz, yashimishije abakunzi b’umuziki kuburyo bushoboka.

Imana imwakirire Roho Kandi imuhe kuruhukira mu mahoro, Kuri uyu wa 17 Kanama nibwo inkuru mbi yasesekaye ko Buravan yatuvuyemo.

Leave a Reply

Your email address will not be published.